Tetun: MINISTRU MAE HALA'O DIALOGU KOMUNITÁRIU KONABA PLANU ESTABELESIMENTU POSTU ADMINISTRATIVU MATEBIAN IHA SUKU LAISORULAI DESIMA , MUNISÍPIU BAUCAU

Baucau, 2 Dezembru, 2022--Ministru Administrasaun Estatal, Miguel Pereira de Carvalho, akompanã husi Prezidente PAM Baucau, Olívio Freitas, Komandante PNTL Munisípiu Baucau, António de Sá, Deputada husi PN, Gabriela Alves, Xefe Gebinete nomós Assesor sira husi MAE, hala'o diálogu ho líder Komunitáriu nomós Konunidade sira husi Suku 5 iha Suku Laisorulai Desima, PA Quelicai, Autoridade Munisipiu Baucau. Sekuênsia husi atividade diálogu ne'e, hahu ho seremónia kultural husi suku 5, liu husi tara tais, simu husi formatura morador sira, Lian Dadolin husi lia Nain, halolo "Bua-Malus' nomós dansa tradional. Atividade diálogu ne'e, hala;o mós seremónia entrega rai husi Rai Nain nain 3 mak hanesan Martinho da Costa, Eduardo da Costa nomós Rui Aureo Pinto, luan hektar 4 resin ho objetivu atu harí'í Postu Administrativu foun ho naran Matebian [Mate, terus tamba Independênsia Nasional], ne'ebe asisti husi Ministru MAE, PAM Baucau, PNTL Munisípiu, Deputada PN nomós Autoridade sira husi suku 5. Prezidente PAM hato'o iha ninia introdusaun katak, ohin hau mai akompanã Ministru MAE hodi rona rasik hanoin nomós opiniaun sira husi Komunidade hotu iha suku 5 ne'ebe atu harí'í postu foun ho naran PA Matebian, hodi haktuir karta pedidu ne'ebe, haruka ba iha PAM nomós MAE. Maibe tenki hare mós lei konaba divizaun teritorial nian, tamba tuir prosesu sei lao hela. Tamba ne'e, proposta husi komunidade, presija konvense Ministru hodi bele defende iha Konsellú Ministru nomós Parlamentu Nasional hodi bele hetan aprovasaun. Tamba ne'e, husu ba Autoridade sira, Veteranu, Juventude, intelektual sira nomós entidade hotu iha suku 5, hodi bele kontribui iha diálogu ida ne'e, tenik Prezidente PAM. Autoridade husi Suku 5 inklui Intelektual, Veteranu, Juventude, Reprezente Feto nomós Konfisaun Relijioju sira hato'o mós sira nia preokupasaun katak, prosesu atu harí'í Postu Administrativu Matebian, mai husi diskusaun ne'ebe naruk tamba, iha ligasaun ho Naran, área Jeográfiku, populasaun no seluk-seluk tan. Konaba Naran Postu Administrativu mak PA Matebian, konêsidu nudar Unidade 5, Jeografikamente PA Matebian iha suku 5, Total Populasaun hamutuk rihun 10 resin nomós uma kain besik rihun 3, luan 80,48 km2. Lamenta mós katak, durante ne'e, komunidade idozo nomós defisiênte sira hetan problema barak konaba distãnsia atu asesu ba Subsidiu nomós asesu ba edukasaun tamba do'ok nomós iha mota ne'ebe bo'ot wanhira tempu udan. Husi fator sira ne'e mak, komunidade sira ejije hodi har'í urjente PA foun hodi bele fasilita komunidade sira husi suku 5. Ministru Administrasaun Estatal, Miguel Pereira de Carvalho hato'o dialogu ne'e katak, Prosesu atu hari'í PA ne'e, dalan ida mak liu husi Konsulta públiku, mak ohin ita hotu mai iha ne'e, hodi rona opiniaun, mensajen nomós aspirasaun hotu, husi Unidade 5 Matebian hodi bele ba defende iha Konsellú Ministru nomós Parlamentu Nasional hodi bele foti desijaun ba futuru Postu Administrativu. Tuir Governante ne'e katak, intervensaun sira ne'ebe ohin hato'o, prense ona rekejitu balun mak hanesan naran Postu, Númeru populasaun nomós fatin atu harí'í Postu foun. Tamba ne'e, Ministru afirma katak, Pontu 1. mak hodi naran MAE nian sei lori aspirasaun husi Unidade 5, ba iha Konsellú Ministru nomós Parlamentu Nasional, 2. Aspirasaun sira ne;e sei transforma ba iha proposta konaba alterasaun ba Lei devijaun teritorial nian hodi troka lei refere ba estabelesimentu PA Matebian, 3. MAE sei halo esforsu hotu, hodi realiza mehi ne'ebe mai husi Unidade 5, PA foun " Matebian. Partisipa iha diálogu refere mak: Autoridade husi suku 5, Xefe aldeia 20 nomós lia nain sira, PNTL Postu Administrativu, Veteranu, Intelektual, Konfisaun Relijioju, Juventude nomós Komunidade sira husi suku 5. REMATA

Medi@MAE.2022